Norrænir velferðarvísar að íslenskri fyrirmynd

Frétt úr velferðarráðuneytinu
04.04.17

Tillaga Þorsteins Víglundssonar félags- og jafnréttismálaráðherra um að Norðurlöndin vinni áfram að þróun sameiginlegra norrænna velferðarvísa var samþykkt á fundi norrænna ráðherra félags- og heilbrigðismála í Ósló í síðustu viku.

Norrænir velferðarvísar eru ein af afurðum Norrænu velferðarvaktarinnar, rannsóknarverkefnis sem unnið var undir formennsku Íslands í norrænu samstarfi árin 2014-2016 og voru íslensku félagsvísarnir hvatinn að verkefninu. Sigríður Jónsdóttir, sérfræðingur í velferðarráðuneytinu, leiddi rannsóknarverkefnið um norrænu velferðarvísana en fjöldi sérfræðinga frá öllum Norðurlandaþjóðunum kom að verkefninu. Vísarnir eru þrjátíu, valdir af norrænum starfshópi sérfræðinga og eru lýsandi fyrir stöðu velferðarmála á Norðurlöndunum.

Þorsteinn Víglundsson segir þetta gott dæmi um svið þar sem Ísland hefur nýtt reynslu sína og miðlað henni með nágrannaþjóðum sínum: „Þetta verkefni var Íslandi mjög mikilvægt og gaf góða raun á tímum djúprar efnahagslegrar lægðar og var skilgreint forgangsverkefni. Í kjölfarið var lagt til þróaðir yrðu sameiginlegir norrænir velferðarvísar til frambúðar og nú liggur fyrir ákvörðun um að halda áfram þeirri vinnu.“

Á ráðherrafundinum var einnig ákveðið að haldið verði norrænt velferðarþing árið 2018, þar sem fjallað verði um helstu áskoranir sem norrænu velferðarkerfin standa frammi fyrir. Vettvangur þessi verður tilraunaverkefni og byggir einnig á tillögu Norrænu velferðarvaktarinnar.

Sjá nánar hér: https://www.velferdarraduneyti.is/norraen-velferdarvakt/frettir-og-vidburdir/lokaradstefna-norraenu-velferdarvaktarinnar

Fleiri greinar