17 apr Hvernig kemstu?
Fyrir þremur árum bjó bjuggum við fjölskyldan í Urriðaholti. Við gáfumst upp vegna skorts á tengingum á milli hverfa og skorts á almenningssamgöngum. Ég veit af eigin raun hvað gerist þegar það er ekki verið að mæta þörfum fólks í hverfum í uppbyggingu. Engin fjölskylda ætti að hafa þörf fyrir að flytja vegna þess að barn kemst ekki öruggt á æfingu eða milli hverfa, þó að hverfið sé ekki fullbyggt. Það er ekki óhjákvæmilegt – það er ákvarðanavandi!
Þegar sveitarfélög setja sér skýra og samræmda framtíðarsýn fyrir þróun hverfa og bæjarhluta verða ákvarðanir markvissari og ábyrgari. Skipulag og uppbygging einstakra hverfa hafa úrslitaáhrif á öryggi, möguleika og lífsgæði íbúa. Jafnframt er mikilvægt að horfa til þess að skýr sýn í uppbyggingu hverfa er hagkvæm til lengri tíma litið, bæði fjárhagslega og samfélagslega.
Fyrir Garðabæ er það skynsamleg og hagkvæm stefna að tryggja öruggar tengingar fyrir gangandi og hjólandi milli hverfa, jafnvel þegar uppbygging þeirra er ekki fullgerð. Á sama hátt er hagkvæmt að huga snemma að öruggu og skilvirku umferðarflæði inn og út úr hverfum í uppbyggingu. Með slíkri nálgun er bæði stuðlað að öryggi og vellíðan íbúa og komið í veg fyrir kostnaðarsamar leiðréttingar síðar meir.
Stýrum þróun í stað þess að bregðast við!
Ef við tökum Vetrarmýri sem dæmi, líkt og Urriðaholt er um að ræða hverfi sem byggist upp í nánu samspili við náttúru og friðlýst svæði. Slík staðsetning skapar eðlislægar takmarkanir á inn- og útkeyrslu samanborið við hefðbundin hverfi. Því vaknar sú áleitna spurning: af hverju er ekki hafin markviss greining á því hvernig umferð mun þróast samhliða uppbyggingu hverfisins?
Umferðarmynstur mótast af byggðamynstri, staðsetningu þjónustu og atvinnu, sem og ferðavenjum fólks – ekki öfugt. Þegar framtíðarsýn fyrir hverfi er óljós verða umferðargreiningar óhjákvæmilega viðbrögð við vanda sem hefur þegar skapast. Slík nálgun leiðir til skammtímalausna og kostnaðarsamra aðgerða eftir á.
Skýr og samræmd framtíðarsýn gerir pólitíkinni hins vegar kleift að spá fyrir um ferðavenjur áður en álag myndast, meta áhrif nýrrar byggðar á heildarkerfi samgangna og forgangsraða öruggum tengingum fyrir gangandi og hjólandi. Með því má draga úr þörf fyrir dýrar „plástralausnir“ síðar meir. Þannig verður skipulagið fyrirbyggjandi í stað þess að vera viðbragðsmiðað sem er bæði skynsamlegra, hagkvæmara og ábyrgara gagnvart íbúum.
Harpa Þorsteinsdóttir,
varabæjarfulltrúi og býður sig fram í 2. sæti á lista XC í Garðabæ.