27 okt Öfluga konu áfram á þing

Jóna Sólveig Elínardóttir hefur sýnt það og sannað að hún á fullt erindi sem fulltrúi á Alþingi. Á allt of stuttu starfstímabili þingsins frá því að síðast var kosið hefur hún öðlast dýrmæta reynslu og verið trúað fyrir veigamiklum hlutverkum. Hún hefur verið formaður utanríkismálanefndar, setið í forsætisnefnd þingsins og enn fremur velferðarnefnd sem allt eru fjölbreyttir og mikilvægir málaflokkar. Hún hefur auk þess tekið þátt í starfi þingmannanefndar Íslands og Evrópusambandsins og Íslandsdeild Norðurlandaráðs.

Jóna Sólveig er alin upp í Sólheimahjáleigu í Mýrdal. Hún gekk í framhaldsskóla í Frakklandi og lauk stúdentsprófi þaðan, tók síðan BA í frönsku og MA í stjórnmálafræði frá Háskóla Íslands. Hún hefur starfað hjá utanríkisþjónustunni og kennt við HÍ. Það fer því ekkert á milli mála að hér er á ferðinni yfirburðar einstaklingur sem hefur komist áfram á eigin verðleikum.

Jóna Sólveig sem nú er búsett á Selfossi, er mikil baráttukona og hefur sterka sýn á að setja almanna hagsmuni ofar sér hagsmunum.

Ég vil skora á íbúa Árborgar og Suðurkjördæmis að greiða Viðreisn atkvæði sitt og tryggja íbúum kjördæmisins þessa öflugu þingkonu til áframhaldandi starfa. XC á kjördag.

Ingunn Guðmundsdóttir, Selfossi, skipar 13. sæti Viðreisnar í Suðurkjördæmi.

Greinin birtist fyrst í Dagskránni, fréttablaði Suðurlands 27. október 2017