Styrkja

 

Uppreisn, ungliðahreyfing Viðreisnar

Uppreisn stendur fyrir frelsi, jafnrétti og opið samfélag. Samtökin eru svar ungs fólks við afturhaldi, sérhagsmunagæslu og einangrunarhyggju. Frjálslyndi og jafnræði helst í hendur og stuðlar þannig að réttlátu samfélagi sem hefur burði til að viðhalda samkeppnishæfum lífsgæðum og þátttöku í samstarfi þjóða. Uppreisn trúir því að ungt fólk eigi sæti skilið til jafns við alla aðra hópa þjóðfélagsins og berst því fyrir því að rödd þeirra heyrist og að mark verði tekið á henni.

Uppreisnarliðar sinna málefna- og trúnaðarstörfum fyrir ungliðahreyfinguna og Viðreisn. Hreyfingin tryggir að raddir ungs fólks heyrist hátt og skýrt innan Viðreisnar. Einnig stendur hreyfingin fyrir alls konar viðburðum allt árið sem eru opnir hverjum þeim sem kunna að hafa áhuga. Formaður Uppreisnar á sæti í stjórn Viðreisnar.

Uppreisn stendur reglulega fyrir viðburðum. Hægt er að fylgjast með starfinu á facebook- síðu Uppreisnar, Twitter og Instagram. Einnig er hægt að senda tölvupóst á netfangið uppreisn@vidreisn.is.

 

Stjórn Uppreisnar skipa:

Gabríel Ingimarsson forseti
Sverrir Páll Einarsson varaforseti
Alexander Hauksson
Ingvar Þóroddsson
María Ellen Steingrimsdóttir
Oddgeir Páll Georgsson
Ingunn Rós Kristjánsdóttir

Sækja lög Uppreisnar í PDF formi.

  1. gr. Félagið heitir Uppreisn og er hreyfing frjálslynds ungs fólks innan Viðreisnar. Heimili þess og varnarþing er í Reykjavík. 

  2. gr. Hlutverk félagsins er að:
    Vera ungliðahreyfing Viðreisnar.
    Berjast fyrir frjálslyndum gildum meðal ungs fólks í samfélaginu.
    Ungt fólk innan Viðreisnar hljóti brautargengi í kosningum.
    Gæta hagsmuna ungliða innan Viðreisnar.
    Stuðla að því að rödd ungliða Viðreisnar fái að heyrast innan flokksins og í samfélaginu öllu.

     

  3. gr. Uppreisn gætir jafnréttis í öllum störfum sínum. Sérstaklega skal þess gætt að ekki halli á einstakling vegna kyns, kynvitundar, kyneinkenna, kynhneigðar, hreyfigetu, trúarafstöðu, uppruna, litarhafts, eða stöðu að öðru leyti þegar valið er í trúnaðarstörf á vegum hreyfingarinnar.

4. gr. Félagsaðild að ungliðahreyfingunni hljóta allir félagar í Viðreisn á aldrinum 16 til 35 ára.

5. gr. Úrsögn úr ungliðahreyfingunni skal berast skrifstofu Viðreisnar með rafrænum hætti og stafa frá viðkomandi aðila.

  1. gr. Landsfundur hefur æðsta vald í málefnum félagsins. Landsfundur skal halda eigi síðar en fjórðu vikuna í september ár hvert. Til landsfundar skal boða með áberandi tilkynningu á samfélagsmiðlum og með tölvupósti til allra félaga, með fjögurra vikna fyrirvara hið skemmsta. 

  2. gr. Dagskrá landsfundar skal vera:
  • Samþykkt fundarskapa
  • Kosning fundarstjóra og ritara og eins aðila í kjörstjórn
  • Skýrsla framkvæmdastjórnar og umræður.
  • Skýrsla gjaldkera, framlagning og umræður um reikninga
  • Lagabreytingar
  • Kosningar í embætti í eftirfarandi röð:
    1. Kosning forseta Uppreisnar
    2. Kosning varaforseta Uppreisnar
    3. Kosning fimm meðstjórnenda í framkvæmdastjórn
    4. Kosning allt að átta fulltrúa í félagastjórn
    5. Kosning tveggja skoðunarmanna reikninga
  • Önnur mál
  • Þingslit 

  1. gr. Allir félagar í Uppreisn, sem skráðir hafa verið í félagið minnst viku fyrir landsfund, hafa kjörgengi í embætti og atkvæðisrétt þegar kosið er í stjórnir eða um lagabreytingar. 

  2. gr. Framboðsfrestur til framkvæmdastjórnar félagsins rennur út viku fyrir landsfund. Ef ekkert framboð berst í eitthvert embættanna er kjörstjórn heimilt að framlengja framboðsfrest fyrir það tiltekna embætti. Í þeim tilvikum ber kjörstjórn að auglýsa að ekkert framboð hafi borist og að framboðsfrestur hafi verið framlengdur. Tryggja skal að frambjóðendur til embætta hafi jafnan aðgang að kjörgögnum, þ.m.t. félagatali, strax við fundarboð á landsfund. 

  3. gr. Lögum félagsins verður aðeins breytt á landsfundi. Tillögum um lagabreytingar skal skila til framkvæmdastjórnar félagsins eigi síðar en fimm dögum fyrir landsfund. Framkvæmdastjórn skal auglýsa lagabreytingatillögur með áberandi hætti eigi síðar en fjórum dögum fyrir landsfund. Til að lagabreytingatillaga nái gildi þarf hún samþykki að minnsta kosti 2/3 fundarmanna. Um lagabreytingar skal kosið með handauppréttingum nema fundur samþykki leynilega kosningu að tillögu fundarmanns. Fundarstjóri telur atkvæði og ritari landsfundar skráir þau niður. 

  4. gr. Kosning til beggja  stjórna skal vera skrifleg og leynileg. Framkvæmdastjórn félagsins skal skipa kjörstjóra tveimur vikum fyrir landsfund. Kjörstjóri getur ekki boðið sig fram í til stjórna félagsins. Kjörstjóri tekur á móti framboðum í stjórnir félagsins, telur atkvæði og tilkynnir úrslit að talningu lokinni. Ritari landsfundar skal vera viðstaddur talningu atkvæða og skrá niðurstöður í fundargerð.
  1. gr. Félagastjórn fer með æðsta vald samtakanna milli landsfunda og uppreisnarþinga. Í félagastjórn eiga sæti allir fulltrúar í framkvæmdastjórn auk allt að átta fulltrúa sem kosnir eru á landsfundi. Að auki hafa forsetar aðildarfélaga Uppreisnar fulla aðild að félagastjórn. Félagar í Uppreisn sem kjörnir hafa verið sem aðal- eða varamenn í stjórn eða málefnaráð Viðreisnar hafa rétt til setu á öllum fundum félagastjórnar með tillögu og málfrelsisrétt.

  2. gr. Félagastjórn ber ábyrgð á ályktunum, málefnastarfi milli landsfunda og uppreisnarþinga. Félagastjórn hefur eftirlit með störfum framkvæmdastjórnar. Félagastjórn getur falið framkvæmdastjórn að sinna þeim verkefnum sem talin eru nauðsynleg hverju sinni.

    14. gr. Félagastjórnarfundi skal að jafnaði halda a.m.k. einu sinni á tveggja mánaða fresti. Á fundum félagastjórnar skal framkvæmdastjórn fara yfir störf sín frá síðasta fundi félagastjórnar. Forseti fer með oddaatkvæði ef atkvæði verða jöfn. Félagastjórnarfundi skal að jafnaði boða með minnst viku fyrirvara. Óski fjórðungur almennra félagastjórnarfulltrúa eftir fundi ber að halda hann innan viku frá því forseta berst slík ósk skriflega. Félagastjórn er auk þess frjálst að veita gestum aðgang að fundum sínum.

  3. gr. Félagastjórn getur sent frá sér ályktanir um málefni sem eru í anda samþykktrar stefnu. Félagastjórn skal á fyrsta fundi sínum eftir reglulegan landsfund samþykkja verklagsreglur og verkaskiptingu framkvæmdastjórnar.

  4. gr. Framkvæmdastjórn sér um daglegan rekstur félagsins, annast tengsl við aðildarfélög, vinnur að eflingu starfsins um land allt og ber ábyrgð á þeim verkefnum sem einstökum fulltrúum framkvæmdastjórnar er falið að sinna. Framkvæmdarstjórn skal einnig sinna þeim verkefnum sem henni eru falin af félagastjórn.

  5. gr. Í framkvæmdastjórn eiga sæti forseti varaforseti og fimm meðstjórnendur. Á fyrsta fundi framkvæmdastjórnar eftir landsfund skiptir stjórnin með sér verkum. Skal hann vera haldinn fyrir fyrsta fund félagastjórnar.

Framkvæmdastjórn skal að minnsta kosti skipta með sér eftirfarandi embættum: ritari og gjaldkeri. Skal þessi verkskipting staðfest af félagastjórn á fyrsta fundi hennar eftir landsfund.

  1. gr. Framkvæmdastjórn er heimilt að skipa nefndir fyrir innra starf hreyfingarinnar. Skal félagastjórn samþykkja allar skipanir í nefndir á vegum Uppreisnar.

  2. gr. Á fyrsta fundi félagastjórnar eftir reglulegan landsfund skulu kjörnir tveir varamenn framkvæmdastjórnar úr hópi þeirra átta fulltrúa sem kosnir í voru á landsfundi. Skal kosning um varamenn fara fram með leynilegum hætti. Ef aðeins eru tveir í framboði skal fara fram kosning þar sem aðilar þurfa að hljóta minnst 50% atkvæða til að ná kjöri. Náist ekki að manna varamannsstöður skal kosið aftur á næsta fundi félagastjórnar. Varamenn þessir skulu taka sæti á framkvæmdastjórnarfundum í forföllum kjörinna aðalmanna eða ef að þeir segja af sér eða er vikið úr embætti. Atkvæðafjöldi á fyrsta fundi félagastjórnar ræður því í hvaða röð varamenn taka sæti í framkvæmdastjórn.

  3. gr. Félagastjórn er hemilt að lýsa yfir vantrausti á einstaka fulltrúa í framkvæmdastjórn eða framkvæmdastjórn í heild sinni. Ef upp kemur tillaga um vantraust undirritað af minnst þremur einstaklingum úr félagastjórn skal tillaga tekinn fyrir á næsta löglega fundi félagastjórnar. Samþykki félagastjórn vantraust með einföldum meirihluta skal framkvæmdastjórn boða til félagafundar þar sem vantraust þarf að vera samþykkt með ⅔ hluta atkvæða. Sé vantraust samþykkt skal fyrsti varamaður í framkvæmdastjórn taka sæti í þar til á næsta landsfundi.

  4. gr. Framkvæmdastjórn ber ábyrgð á verkum sínum gagnvart félagastjórn og skal lúta eftirliti félagastjórnar með störfum sínum.

22.gr. Framkvæmdastjórnarfundi skal halda eins oft og þurfa þykir. Forseti boðar til fundar með minnsta þriggja sólahringa fyrirvara og fer með oddaatkvæði ef atkvæði verða jöfn.
Framkvæmdastjórn er frjálst að veita gestum aðgang að fundum sínum.

  1. gr. Framkvæmdastjórn getur ekki skuldbundið samtökin fjárhagslega vegna daglegs reksturs þeirra nema með samþykki félagastjórnar.

  2. gr. Framkvæmdastjórn er heimilt að ráða starfsmenn sér til aðstoðar. Skal ráðning þeirra staðfest af félagastjórn áður en hún tekur gildi.
  1. gr. Uppreisnarþing er, auk landsfundar, æðsti vettvangur málefnastarfs félagsins og uppskeruhátíð þess. Uppreisnarþing skal haldið árlega, á fyrsta ársfjórðungi.  

  2. gr. Málefnaskrá félagsins skal vera tvískipt. Annars vegar grunnstefna og hins vegar ályktanasafn. Grunnstefnan skal vera skýr og stikla á stóru um grunnhugmyndafræði félagsins. Henni verður aðeins breytt á landsfundi. Ályktanasafn inniheldur allar þær ályktanir sem samþykktar hafa verið á landsfundi eða Uppreisnarþingi. Ályktanir skulu taka fyrir afmörkuð málefni og skulu ekki ganga gegn grunnstefnu.  

  3. gr. Ályktanir fyrnast sjálfkrafa fjórum árum eftir samþykkt þeirra, nema annað sé lagt sérstaklega til á samsvarandi landsfundi eða Uppreisnarþingi.
  1. gr. Nefndir eru vinnuhópar sem skipaðir eru af stjórn. Hver nefnd skal hafa formann sem er tengiliður nefndar við stjórn. Formaður nefndar þarf eingöngu að vera félagi í Uppreisn og skal vera skipaður af stjórn. Nefndir ungliðahreyfingarinnar hafa ekki heimild til að skrifa undir samninga í nafni félagsins án umboðs stjórnar. 

  2. gr. Heimilt er að stofna undirfélög undir ungliðahreyfingu Viðreisnar. Tilgangur og hlutverk slíkra félaga skal vera í samræmi við lög ungliðahreyfingarinnar og rúmast innan stefnu Viðreisnar. Stofnun undirfélags er háð samþykki félagastjórnar.

  3. gr. Ef einstaklingur innan félagsins sýnir af sér ósæmilega háttsemi sem gengur gegn almennu siðferði eða hagsmunum og stefnu ungliðahreyfingarinnar er framkvæmdastjórn heimilt að vísa viðkomandi úr félaginu. Í þeim tilvikum á viðkomandi rétt á að fara fram á að fundur félagastjórnar verði haldinn innan tveggja vikna sem hefur úrslitavald um ákvörðun stjórnar með leynilegri kosningu.

  4. gr. Meiriháttar ágreining um lög þessi skal útkljá á landsfundi og ræður afl atkvæða niðurstöðu.

  5. gr. Ákvörðun um að leggja félagið niður skal tekin af tveimur landsfundum í röð og samþykkt af 2/3 hluta fundarfólks á báðum fundum. Um ráðstöfun eigna verður farið samkvæmt samþykkt seinni fundar. Óheimilt er að láta eignir renna til félagsfólks.

  6. gr. Forseta og gjaldkera er heimilt að rita undir tilkynningu um prókúruskipti sé það samþykkt á fundi stjórnar.

Sækja Ályktunarbók Uppreisnar á PDF formi.

Uppreisn – Ungliðahreyfing Viðreisnar stendur fyrir frjálsu, jöfnu og opnu samfélagi. Um þetta er kveðið í grunnstefnu hreyfingarinnar og er það sem allt málefnastarf hennar byggir á og ályktanir taka mið af.

Þrír vettvangar innan Uppreisnar eru ályktanabærir, landsþing Uppreisnar, Uppreisnarþing og félagastjórn Uppreisnar. Ályktanabók með þessum hætti var fyrst tekin í notkun að loknu Uppreisnarþingi 15. febrúar 2020 en fyrir þann tíma hafði Uppreisn tekið virkan þátt í stefnumótun Viðreisnar og fjölmörg mál komið fyrst fram á Uppreisnarþingi áður en þau rötuðu í stefnuskrá flokksins. 

Félögum er frjálst að senda inn ályktanir um öll heimsins mál, sem eru svo tekin í opna umræðu aðgengilega öllum innan raða Uppreisnar. Mál sem rata í ályktanabók Uppreisnar hafa fengið lýðræðislega meðferð og endurspegla áherslur sem Uppreisnarliðar vilja sjá frá kjörnum fulltrúum Viðreisnar. Með þessu samansafni ályktana er vonast eftir því að vilji ungliðahreyfingarinnar skili sér til eyrna þeirra sem hafa vald til breytinga og endurspeglist í málflutningi þeirra. Ályktanabókin hefst á grunnstefnu Uppreisnar.

 

Ályktanabók Uppreisnar var síðast uppfærð á Uppreisnarþingi 25. maí 2024.

Uppreisn stendur fyrir frelsi, jafnrétti og opið samfélag.

Frjálslyndi, jafnrétti og öflugt alþjóðasamstarf helst í hendur og stuðlar þannig að réttlátu samfélagi og samkeppnishæfum lífsgæðum. Uppreisn berst fyrir samfélagi þar sem allir einstaklingar njóta frelsis, sem og jafnra tækifæra til þess að vaxa og dafna. Tryggja þarf að lýðræðisleg umræða sé upplýst og opin, og að virðing sé borin fyrir ólíkum skoðunum. 

Frelsi

Uppreisn vill að einstaklingar séu frjálsir til að taka eigin ákvarðanir og bera ábyrgð á þeim.
Frelsi einstaklingsins skal haft að leiðarljósi við lagasetningu og því ekki settar skorður nema það gangi á frelsi annara.

Uppreisn treystir einkaaðilum til þess að sinna hinum ýmsu verkefnum, er gagnrýnin á ríkisvaldið og á móti einokun, hvort sem er á hendi ríkis eða einkaaðila. Sköttum og öðrum opinberum gjöldum skal haldið í lágmarki.

Jafnrétti
Jafnrétti er forsenda frelsis. Allt fólk á að hljóta jöfn tækifæri í námi og starfi og standa jafnt frammi fyrir rétti. Ekki skal mismuna neinum á grundvelli uppruna, litarhafts, kynhneigðar, kynvitundar, fötlunar, trúar, búsetu eða stöðu að öðru leyti. Uppreisn berst gegn misrétti, fordómum og hvers kyns ofbeldi sem fyrirfinnst í samfélaginu.

Opið samfélag

Alþjóðlegt samstarf er besta leiðin til að takast á við áskoranir bæði nútíðar og framtíðar. Uppreisn styður því heilshugar inngöngu Íslands í Evrópusambandið og fulla þátttöku landsins í evrópsku samstarfi, ásamt áframhaldandi þátttöku þess á vettvangi Atlantshafsbandalagsins, í norrænu samstarfi og á vettvangi Sameinuðu Þjóðanna.

Ísland á að taka öllum sem hér vilja vera opnum örmum og hjálpa þeim að taka virkan þátt í samfélaginu. Þannig búum við til fjölbreytt, frjálslynt og opið samfélag.

Samþykkt á Uppreisnarþingi 2020, endurnýjað á Uppreisnarþingi 2024

 

  1. Uppreisn ályktar að leyfa ætti innlendum fjölmiðlum að auglýsa áfengi og veðmálastarfsemi.

  2. Slíkar auglýsingar sjást víða á netmiðlum og í erlendum blöðum og tímaritum sem eru til sölu í íslenskum verslunum. Það er því verið að mismuna innlendum fjölmiðlum og halda frá þeim mikilvægri tekjulind.

  3. Aðgerð sem þessi væri til þess fallin að styrkja rekstrarstöðu einkarekinna fjölmiðla svo um munar.

Samþykkt á Uppreisnarþingi 2022

 

  1. Uppreisn ályktar að sala á áfengi skuli gefin alveg frjáls. Sala á áfengi á vegum ríkisins stenst ekki þá skoðun að ríkið skuli sjá fólki fyrir nauðsynjavörum.

  2. Svar við auknu aðgengi ungs fólks að áfengi skal ekki vera að hefta aðgengi almennings að því heldur með auknu átaki í forvarnastarfi sem er ekki í formi hræðsluáróðurs.

Samþykkt á Uppreisnarþingi 2020, endurnýjað á Uppreisnarþingi 2024

 

  1. Uppreisn ályktar að lækka eigi álögur á fjármálafyrirtæki, enda sé ekki ástæða til að skattleggja þau umfram annan rekstur.

  2. Skattlagning á íslensk fjármálafyrirtæki er með því hæsta sem þekkist í hinum vestræna heimi. Það dregur úr samkeppnishæfni fyrirtækja á alþjóðlegum markaði og eykur sömuleiðis rekstrarkostnað þeirra. Það leiðir svo af sér verri og dýrari þjónustu til viðskiptavina.

  3. Afnema ætti sérstakan bankaskatt, enda takmörkuð rök fyrir því að starfsemi fjármálafyrirtækja sé skattlögð umfram starfsemi annara fyrirtækja. Afnám bankaskatts myndi jafnframt liðka verulega fyrir sölu ríkisins á hlut þess í bönkunum.

Samþykkt á Uppreisnarþingi 2022

 

  1. Lögleiða ætti allar tegundir bardagaíþrótta á Íslandi, í áhuga- sem og atvinnumennsku.

  2. Semja þarf skýra löggjöf um bardagaíþróttir á Íslandi, í samráði við iðkendur þeirra, sem tryggir öryggi og réttindi keppenda.

  3. Stuðla ætti að auknum tækifærum til atvinnumennsku í öllum íþróttum innanlands, þ.m.t. bardagaíþróttum.

Samþykkt á Uppreisnarþingi 2022 

 

  1. Uppreisn ályktar að flugvellinum í Reykjavík verði lokað og blönduð byggð íbúðarhúsnæðis og rekstrar verði reist í hans stað í Vatnsmýri.

  2. Undir flugvellinum er verðmætt land sem hagkvæmast væri að nýta til þess að þétta byggð í Reykjavík. Það stuðlar að betri lífsgæðum, minni umferðarþunga og grænni borg.

  3. Samhliða því verði komið upp neti neyðarflugs með björgunarþyrlum um allt land.

Samþykkt á Uppreisnarþingi 2023

 

  1. Uppreisn vill sjá miklar breytingar á því hvernig skattaumhverfinu þegar kemur að erfðafjárskatti. Uppreisn vill að dánarbú verði ekki lengur sá lögaðili sem greiðir skattinn heldur reiknast hann og er greiddur af hverjum og einum erfingja fyrir sig af þeim hluta sem aðilinn erfðir.

  2. Uppreisn vill að hver og einn einstaklingur fái skattfrjálsan arf upp að ákveðnu marki en eftir það skal sett á mun hærri erfðaskattur en er á Íslandi í dag.

  3. Hár erfðafjárskattur tryggir að sá auður sem til er í samfélaginu safnist ekki á hendur fárra hendur og sé ekki nýttur til að keyra áfram mikilvægar úrbætur í samfélaginu. Uppsöfnun auðs á hendur fárra er ein mesta hætta við lýðræðið í hinum vestræna heimi í dag og því um lýðræðisumbætur að ræða ekki bara efnhagslega aðgerð.

Samþykkt á Uppreisnarþingi 2022

 

  1. Uppreisn ályktar að nýbyggingar taki meira mið af þörfum ungs fólks en áður, hvort sem kemur að kaupendum eða leigjendum. 

  2. Þetta skal gert með áframhaldandi uppbyggingu fjölbreytts húsnæðis á þéttingarreitum, samhliða einfaldari reglugerðum. 

  3. Taka má ákvarðanir sem stuðla að hagkvæmara húsnæði, á borð við að sleppa bílastæðakjallara, bjóða upp á sameiginleg rými og svo framvegis. 4. Einnig má byggja í þágu ungs fólks með því að byggja nýbyggingar sem henta eldra fólki sem vill minnka við sig, svo að sölukeðjan sem leiði af sölu þeirra eigna verði til hagsbóta fyrir ungt fólk.

Samþykkt á Uppreisnarþingi 2022

 

  1. Uppreisn ályktar að það beri að gera opinbera úttekt á úrræðum fólks á flótta á Íslandi. 

  2. Mikil leynd hefur ríkt yfir þeim úrræðum sem ríkið býður fólki á flótta upp á hérlendis þar sem ekki er heimild fyrir aðgengi fjölmiðla og fólk sem þar dvelur má ekki bjóða með sér gestum. Fólkið sem dvelur í þessum úrræðum er hrætt við það að vekja athygli á bágum skilyrðum sínum en ýmis hjálparsamtök og aktívistar hafa vakið athygli á því seinustu ár og ljóst er að úrræðum er virkilega ábótavant. 

  3. Í ljósi þeirra ábendinga sem fram hafa komið og sögum fólks á flótta sem hefur dvalið í úrræðum íslenska ríkisins við komu hér til lands, að aðstæðurnar sem við bjóðum fólki upp á hérlendis eru ekki mannsæmandi og við þurfum að gera mun betur.

Samþykkt á Uppreisnarþingi 2022

 

  1. Uppreisn ályktar að börn eigi ekki að vera á sakaskrá. Mikilvægt er að forðast að stimpla börn sem glæpamenn og sýna þeim að þau eigi sér framtíð þrátt fyrir mistök fortíðar. 

  2. Auka þarf forvarnarstarf og betrunarstefnu innan fangelsiskerfisins, það verður ekki gert ef börn eru á sakaskrá. 

  3. Sérstök úrræði ættu að vera í boði fyrir börn sem gerast brotleg við lögin sem halda utan um þau, sýna þeim stuðning og aðra leið í lífinu – án þess að stimpla þau sem glæpamenn út lífið.

Samþykkt á Uppreisnarþingi 2024

 

  1. Uppreisn ályktar að stórefla eigi móttöku barna í menntakerfið sem flytja til Íslands og hafa ekki íslensku að móðurmáli. 

  2. Með því að stórefla móttökuskóla, móttökudeildir og íslenskuver, ásamt því að tryggja skilvirkt samstarf þessara úrræða við grunnskóla, tökum við betur utan um þessi börn. Þá sé það gert að því markmiði að veita þeim markvissa og yfirgripsmikla íslenskukennslu, aðlögun að íslensku skólaumhverfi og samfélagi fyrst þegar þau koma til landsins, til þess að undirbúa þau til að ganga í sína hverfisskóla að þessu tímabili loknu. 

  3. Uppreisn telur að slíkar aðgerðir muni jafna stöðu erlendra barna þegar þau koma inn í skólastofuna og jafnframt minnka álag á kennara, sem hafa ekki alltaf rými til að grípa þessi börn eins vel og myndi þurfa þegar þau hefja sína skólagöngu hér á landi. Með því að jafna betur stöðu erlendra barna í íslensku skólakerfi tryggjum við þeim tækifæri til að taka fullan þátt í íslensku samfélagi og eiga sömu möguleika og önnur börn.

Samþykkt á Uppreisnarþingi 2020, endurnýjað á Uppreisnarþingi 2024

 

  1. Uppreisn ályktar að einfalda beri skattkerfið, neytendum og fyrirtækjum til hagsbóta. 

  2. Það er mikið hagsmunamál fyrir neytendur jafnt sem fyrirtæki að skattkerfið verði einfaldað. Almenn neytendaþjónusta ætti öll að vera í sama skattþrepi og þar ætti engin þjónusta að vera undanskilin. Ekki ætti að ívilna völdum atvinnugreinum eða stökum fyrirtækjum með skattaafslætti. 

  3. Slíkt jafnræði myndi veita ríkinu svigrúm til að lækka hærra þrep virðisaukaskatts, og jafnvel opna á þann möguleika að fækka þrepunum í eitt.

Samþykkt á Uppreisnarþingi 2024

 

  1. Uppreisn ályktar að Viðreisn gangi ekki í ríkisstjórnarsamstarf nema að tryggt sé í stjórnarsáttmála að þjóðaratkvæðagreiðsla um að taka upp að nýju aðildaviðræður við Evrópusambandið muni fara fram á kjörtímabilinu.

  2. Ef kosið verður um að hefja aðildaviðræður að nýju, skal endanlegur samningur settur í dóm þjóðarinnar og þar með veita þjóðinni lokaorðið.

Samþykkt á Uppreisnarþingi 2022

 

  1. Opinberir háskólar á Íslandi eiga að þjóna samfélaginu öllu, en vöntun á fjarkennslu gerir mörgum erfitt að stunda nám 

  2. Margir velja fjarnám til þess að geta aðlagað náminu að lífi sínu, fjölskyldu, áhugamálum og vinnu. 

  3. Uppreisn kallar á að stjórnvöld semji skýra og aðgengilega fjarnámsstefnu og láti fjármagn fylgja svo hægt sé að bjóða upp á fleiri námsleiðir í fjarnámi við opinbera háskóla. 

  4. Uppreisn sér ekkert til fyrirstöðu að Háskólaráðherra tryggi að opinberir háskólar bjóði upp á fjarnám, þar sem því verður viðkomið, í öllum námsgreinum sem val, og bæta þannig aðgengi fólks að námi.

Samþykkt á Uppreisnarþingi 2024

 

  1. Uppreisn telur fjölga skuli skattþrepum með litlum hækkunum þeirra á milli, að fyrirmynd ríkja eins og Þýskalands, Bretlands og fleiri ríkja, til að tryggja það að ekki sé dregið úr hvata einstaklinga til að afla sér meiri tekna.

  2. Jafnframt telur Uppreisn að hlutfall hæsta tekjuskattþreps skuli ekki hækkað miðað við það kerfi sem er við lýði, enda er tekjuskattur afar hár á Íslandi og mikilvægt er að tryggja að tekjuskattur á einstaklinga hækki ekki frekar.

Samþykkt á Uppreisnarþingi 2022

 

  1. Uppreisn ályktar að flýta skuli framkvæmdum við Sundabraut. 

  2. Sundabraut er mikilvægur liður í því að tengja betur saman hverfi Reykjavíkur, tengir betur höfuðborgarsvæðið við landsbyggðina, býr til nýja flóttaleið fyrir íbúa höfuðborgarsvæðisins og tengir saman meginhluta Reykjavíkur við þann hluta borgarinnar sem liggur norðan Mosfellsbæjar. 

  3. Tryggja skal að með Sundabraut verði einnig til ný stofnæð fyrir almenningssamgöngur í sérrými á höfuðborgarsvæðinu.

Samþykkt á Uppreisnarþingi 2024

 

  1. Uppreisn ályktar að frjálslyndi sé grunngildi hreyfingarinnar. Frjálslyndi er sú hugmyndafræði að einstaklingurinn sé best til þess fallinn að taka ákvarðanir um eigið líf og eigi rétt á að búa við frelsi svo lengi sem það gangi ekki gegn frelsi eða öryggi annarra.

  2. Frjálslyndi skal haft að leiðarljósi við stefnumótun og ákvarðanir Uppreisnar.

  3. Uppreisn ályktar að hreyfingin skuli standa vörð um frjálslynd gildi og beita rödd sinni á vettvangi stjórnmálanna í þeim tilgangi.

Samþykkt á Uppreisnarþingi 2022

 

  1. Uppreisn ályktar að birting, framleiðsla eða innflutningur á klámi, sem gert er af fúsum og frjálsum vilja, eigi ekki að varða við lög. 

  2. Fólki á að vera frjálst að framleiða og dreifa klámefni svo lengi sem það er gert með upplýstu samþykki allra sem fram koma og að það birtir engan undir lögaldri. Fólki á einnig að vera frjálst að afla sér tekna með þeim hætti. 

  3. Fólk á ekki að eiga það á hættu að háttsemi sem engan skaðar valdi því refsingu eða tekjumissi. Ákvæði sem ekki er framfylgt eiga ekki heima í hegningarlögum.

Samþykkt á Uppreisnarþingi 2022

 

  1. Uppreisn ályktar að heilbrigðisstarfsfólk skuli hafa frelsi til að kjósa hvar þau starfa og veita sína þjónustu og jafnframt frelsi til að stunda sjálfstæðan rekstur.

  2. Verkefni Sjúkratrygginga Íslands skal vera að gera samninga við aðila, óháð rekstrarformi, sem veita nauðsynlega heilbrigðisþjónustu, greiða fyrir og tryggja gæði þjónustunnar. Öll skulu hafa aðgengi að sem bestri heilbrigðisþjónustu óháð efnahag. 

  3. Heilbrigð samkeppni milli rekstraraðila sem veita heilbrigðisþjónustu ýtir undir frekari gæði og skilvirkni auk þess sem hún býr til valfrelsi fyrir þau sem þurfa á þjónustunni að halda.

Samþykkt á Uppreisnarþingi 2023

 

  1. Uppreisn ályktar að deiliskipulög séu í flestum tilfellum gerð umtalsvert almennari en tíðkast hefur. Sveitarfélög eiga ekki að niðurnjörva hvað má og má ekki byggja á hverri lóð, né stöðva eðlilega þróun á nýtingu rýma til íbúða eða atvinnu.

  2. Rýmka á heimildir fólks og félaga til að rífa, byggja og breyta húsnæðum á lóðum sem það hefur forráð á. Þannig er hægt að koma til móts við þarfir markaðarins á hvers kyns húsnæði sem vantar á mun skilvirkari, ódýrari, og hagkvæmari hátt.

Samþykkt á Uppreisnarþingi 2022

 

  1. Uppreisn ályktar að leigugreiðslur verði fullnægjandi grundvöllur í greiðslumati fyrir fasteignalán. 

  2. Fólk sem hefur staðið skil á leigu fyrir íbúðarhúsnæði, skv. þinglýstum leigusamningi, í 12 mánuði eða lengur ætti að teljist hafa greiðslugetu fyrir fasteignalán sem samsvarar sömu fjárhæð á mánuði og það hefur greitt á tímabilinu. 

  3. Það leiðir til þess að fólk sem gæti lækkað greiðslubyrði sína með því að kaupa fasteign festist síður á óhagstæðum leigumarkaði.

Samþykkt á Uppreisnarþingi 2020, endurnýjað á Uppreisnarþingi 2024

 

  1. Uppreisn ályktar að kostnaður samfélagsins vegna losunar 

  2. gróðurhúsalofttegunda og annarrar mengunar skuli vera metinn og hann bættur af hálfu þeirra sem valda honum. 

  3. Brýnt er að skapa strax nýja hvata fyrir framleiðendur, t.d. í landbúnaði, til að draga úr losun og mengun sem framleiðslunni fylgir. Má þar nefna að beita sér fyrir lækkun raforkuverðs til grænmetisbænda, og til annarra framleiðenda sem fylgja ströngum umhverfisstöðlum, sem og að leggja niður landbúnaðarstyrki sem greiddir eru fyrir magn af framleiddu kjöti. 

  4. Til að koma í veg fyrir að hækkun mengunargjalda verði að tekjuþúfu fyrir ríkissjóð skulu skatt- eða gjaldstofnar hins opinbera, sem lagðir eru á allan almenning, vera lækkaðir um sömu heildarfjárhæð og mengunargjöldin skila. Þannig er hægt að hvetja fólk og fyrirtæki með áhrifaríkari hætti til að draga úr mengun og mengandi starfsemi. Græn gjöld skulu vera í samræmi við magn og tegund mengunar.

Samþykkt á Uppreisnarþingi 2023

 

Hið opinbera á ekki að vera á samkeppnismarkaði.

Uppreisn vill að hið opinbera fari í það að selja fyrirtæki á samkeppnismarkaði þannig að umfang þess á samkeppnismarkaði verði sem minnst. Það er jákvætt og rétt fyrsta skref að fara í hlutafjáraukningu á fyrirtækjum en markmiðið á alltaf að vera sala fyrirtækjanna til einkaaðila. Skattgreiðendur eiga ekki að þurfa bera ábyrgð á rekstri fyrirtækis á samkeppnismarkaði.

Samþykkt á Uppreisnarþingi 2022

 

  1. Allar opinberar skráningar skulu taka tillit til flóru alls mannkyns m.a. með notkun á kynhlutlausu tungumáli. 

  2. Tryggja ætti að allar opinberar stofnanir fái fræðslu um hinseginleikann og innleiði aðgerðaáætlun um bætta stöðu hinsegin fólks innan sinna raða.

  3. Allt efni sem ætlað er til fræðslu s.s. kynfræðslu og ofbeldisfræðslu ætti að taka mið af fjölbreytileika fólks.

Samþykkt á Uppreisnarþingi 2024

 

  1. Uppreisn ályktar að heimila ætti ívilnanir fyrir fyrirtæki sem bjóða upp á dagvistun fyrir börn fyrir starfsfólk sitt.

  2. Miklir erfiðleikar standa fyrir foreldri/forráðamenn með ung börn þar sem þau komast ekki að á leikskólum. Algengt er orðið að foreldrar þurfi að vera lengur heima með börn en þau myndu vilja eða hafa getu til.

  3. Með þessu væri hægt að auka á valfrelsi foreldra til ákvarðanatöku um hvað verður um börn þeirra á meðan eftir leikskólaplássi er beðið og jafni tækifæri beggja foreldra að komast aftur inn á vinnumarkaðinn.

  4. Einnig væri hægt að létta á erfiðleikum sem hafa skapast varðandi takmörkuð leikskólapláss og langa bið ásamt því að hjálpa vinnustöðum að gera þá eftirsóttarverðari.

Samþykkt á Uppreisnarþingi 2020, endurnýjað á Uppreisnarþingi 2024

 

  1. Uppreisn ályktar að móta ætti reglur um að kolefnisfótspor verði merkt á öllum matvælum með sama hætti og lýsingar á innihaldi. 

  2. Slíkt myndi auka vitund neytenda á áhrifum neyslu sinnar og auðvelda þeim að velja umhverfisvæna kosti. 

  3. Samræma þarf aðferð til mælinga kolefnisfótspors áður en reglur um merkingu matvæla eru innleiddar.

Samþykkt á Uppreisnarþingi 2024

 

  1. Uppreisn ályktar að fasteignaskattur skuli með öllu lagður niður og í stað hans verða settur á landeignarskattur.

  2. Landeignarskattur tekur eingöngu mið af virði undirliggjandi lands og er óháður hvers konar uppbyggingu sem er á því.

  3. Skattalöggjöf ætti að hvetja til betri nýtingu á landi, og uppbyggingu á betri fasteignum og innviðum. Fasteignaskattur er neikvæður hvati fyrir slíkar aðgerðir, þar sem fjárfestingu í slíkri uppbyggingu fylgja hærri skattar.

  4. Fasteignaskattakerfið er jafnframt hvati til lóðabrasks, þar sem lítill kostnaður felst í að eiga vannýtta lóð á eftirsóttri staðsetningu, sem hækkar samt gríðarlega í verði.

Samþykkt á Uppreisnarþingi 2022

 

  1. Uppreisn ályktar að fólki eigi að vera frjálst að velja sér og börnum sínum nöfn án afskipta ríkisins. 

  2. Nafn er nátengt sjálfsmynd og sjálfsvitund fólks og varðar fyrst og fremst einkahagi og persónurétt. Mannanafnanefnd byggir á úreltri hugmyndafræði ríkisafskipta við nafnaval og skal lögð niður. Framtíð íslenskrar tungu er ekki háð því að kvaðir séu lagðar á það hvað fólk megi heita. Mannanafnalögin veita börnum enga vernd fyrir ofbeldi eða vanvirðandi háttsemi af hálfu foreldra sinna.

  3. Nöfn eiga ekki að vera kynbundin.

Samþykkt á Uppreisnarþingi 2024

 

  1. Uppreisn ályktar að gera ætti leikskólastigið að skólaskyldu. Með því myndi virðing gagnvart því starfi sem leikskólar sinna stóreflast, sem og tryggja að nauðsynlegt fjármagn færi til stigsins. 

  2. Líkt og fagfólk innan menntakerfisins hefur bent á að oftar en ekki litið á leikskólastigið sem þjónustustig, en ekki sem fyrsta skólastigið líkt og lög á Íslandi kveða á um. Sé leikskólastigið gert að skólaskyldu er enn fremur verið að festa það í sessi sem fyrsta skólastigið.

  3. Leikskólar sinna nauðsynlegu og faglegu starfi sem tryggir börnum gæðamenntun, uppeldi, umönnun og félagsmótun. Allt er þetta nauðsynlegur undirbúningur fyrir grunnskólagöngu barna.

  4. Leikskólar taka við fjölda nemenda af erlendum uppruna og byggja upp þann nauðsynlega grunn sem börn þurfa til þess að læra tungumálið og taka þátt í íslensku samfélagi, bæði í frístunda- og tómstundastarfi og næstu skólastigum.

  5. Sýnum leikskólastiginu þá virðingu sem það á skilið. Þetta er fyrsta skólastigið, og ætti því að vera skólaskylda.

Samþykkt á Uppreisnarþingi 2022

 

  1. Uppreisn ályktar að loftslagsmarkmið Íslands skuli taka mið af heildarlosun landsins á hverjum tíma og m.t.t. allra losunarflokka. 

  2. Markmið Íslands í loftslagsmálum mega ekki takmarkast við tiltekna losunarflokka. Slíkt er metnaðarlaust og ekki til þess fallið að ná æskilegum árangri í samdrætti losunar. 

  3. Ríkisstjórn skal hverju sinni setja sér loftslagsmarkmið sem taka mið af öllum losunarflokkum og undanskilja ekki tilteknar tegundir losunar. Þá skulu alþjóðlegar skuldbindingar Íslands í losunarmálum einnig taka til allra losunarflokka.

Samþykkt á Uppreisnarþingi 2024

 

  1. Uppreisn ályktar að skattaumhverfi á Íslandi sé óhagstætt og skattar séu almennt séð of háir hér á landi. 

  2. Uppreisn vill að skattar á Íslandi séu lækkaðir samhliða ábyrgari ríkissrekstri þar sem dregið er verulega úr útgjöldum ríkissjóðs með hagræðingu og skilvirka nýtingu almannafés að leiðarljósi.

  3. Uppreisn vill sjá að ríkið setji sér stefnu í sköttum og útgjöldin fylgi. Þetta komið í stað þess viðhorfs sem virðist hafa ríkt að útgjöldin séu ákvörðuð og tekjurnar ákvarðaðar svo seinna.

Samþykkt á Uppreisnarþingi 2020, endurnýjað á Uppreisnarþingi 2024

 

  1. Uppreisn ályktar að lækka eigi kosninga- og kjörgengisaldur niður í 16 ár í öllum almennum kosningum og þjóðaratkvæðagreiðslum. 

     

  2. Ungt fólk verður skattskylt við 16 ára aldur, og því eðlilegt að það fái eitthvað um stjórn lands síns að segja. Eigi einstaklingur að borga skatta á hann líka að hafa eitthvað um það að segja í hvað þeir fara. 

     

  3. Því fylgir ábyrgð að búa í lýðræðissamfélagi og að fela fólki þá ábyrgð fyrr er mikilvægur liður í því að auka lýðræðisvitund ungs fólks, og þar með ýta undir kosningaþátttöku þess. Samhliða þyrfti að auka fræðslu um lýðræði á öllum skólastigum.

Samþykkt á Uppreisnarþingi 2020, endurnýjað á Uppreisnarþingi 2024

 

  1. Lögleiða ætti framleiðslu, neyslu og sölu á vímuefnum. 

  2. Með öllu uppi á borðum er hægt að tryggja regluverk í kring um og eftirlit með bæði framleiðslu og sölu. Það eykur öryggi neytenda umtalsvert, enda tryggir það að efnin sem eru í umferð hverju sinni hafi sem minnst skaðleg áhrif. Einnig fengist betri heildarmynd af neyslunni sem gæti auðveldað forvarnastarf, en samhliða lögleiðingu væri mikilvægt að efla það til muna. 

  3. Lögleiðing er til þess fallin að vinna gegn skipulagðri glæpastarfsemi, bæði innlendri og erlendri.

Samþykkt á Uppreisnarþingi 2022

 

  1. Uppreisn leggur til að skattar, sem hugsaðir eru til þess að minnka neyslu fólks á ákveðnum vörum, verði felldir niður og nýir ekki teknir upp – að undanskildum grænum sköttum. 

  2. Í stað neyslustýrandi skatta skal forvarnarstarf vera eflt til muna og ákveðnar vörur færðar í efra skattþrep virðisaukaskatts, á meðan slík stigskipting er til staðar. 

  3. Neyslustýrandi skattar bitna mest á þeim sem hafa minna milli handanna. Skattar sem þessir hafa takmarkaðan fælingarmátt, þeir sem ætla t.d. að neyta áfengis sér til skemmtunar gera það almennt óháð verði.

Samþykkt á Uppreisnarþingi 2020, endurnýjað á Uppreisnarþingi 2024

 

  1. Auk þess að aðskilja ríki og kirkju er mikilvægt að ríkið láti af opinberri skráningu trúar- og lífsskoðana. 

  2. Utanumhald félagatals og innheimta sóknargjalda ætti að færast á hendur trú- og lífsskoðunarfélaganna sjálfra, þannig rekstri þeirra verði háttað með sama móti og annarra frjálsra félagasamtaka.

Samþykkt á fundi félagastjórnar Uppreisnar 4.11.2023

 

  1. Uppreisn harmar að tilraunir Viðreisnar í Reykjavík til þess að draga úr útgjöldum borgarinnar hafi ekki dugað til, þrátt fyrir vilja, og leitt til þeirrar fjárhagslegu niðurstöðu sem borgarbúar standa nú frammi fyrir.

  2. Uppreisn fordæmir hallarekstur og meðfylgjandi skuldasöfnun Reykjavíkurborgar og fer fram á það að fulltrúar Viðreisnar í Reykjavík beiti sér áfram af öllum krafti fyrir aðhaldi í rekstri og niðurgreiðslu skulda borgarinnar.

  3. Viðreisn í Reykjavík bauð fram á þeim formerkjum að taka skyldi til í rekstri borgarinnar og lofaði að einfalda skipulag og fjármál borgarinnar. Uppreisn kallar eftir betri árangri í þeim efnum og að Viðreisn í Reykjavík haldi áfram að beita sér fyrir betri rekstri Reykjavíkurborgar.

Samþykkt á Uppreisnarþingi 2022

 

  1. Uppreisn álykar að fylgja þurfi eftir málefni um dánaraðstoð og beita sér fyrir því að slíkt verði gert löglegt á Íslandi. 

  2. Þegar fólk er þjáð og dauðvona að mati fagaðila, og vill binda enda á líf sitt á eigin forsendum og með upplýstum vilja, ætti löggjöfin að heimila slíkt með aðstoð fagfólks. 

  3. Nauðsynlegt er að fylgja málinu eftir sem fyrst. Nú þegar er dánaraðstoð í stefnu Viðreisnar, þökk sé Uppreisn, en málið hefur þokast hægt á Alþingi.

Lagt til á fundi félagastjórnar Uppreisnar 4.11.2023

 

  1. Aðkoma nemenda þarf að vera forgangsatriði þegar ræða á sameiningu framhaldsskóla á Íslandi.

  2. Að grundvelli sameiningu framhaldsskóla þurfa að liggja fagleg rök þar sem eðli náms og áherslur skólanna eiga samleið.

  3. Sameiningar framhaldsskóla mega ekki bitna á vali nemenda milli fjölbreytilegra námsleiða og skóla á hverju svæði.

  4. Tryggja þarf að námsframboð um allt land sé fjölbreytt og raunverulegir valkostir séu í boði fyrir nemendur sama hvar þau búa.

  5. – Uppreisn styður hagræðingu í opinberum rekstri á Íslandi, og á það líka við um skólakerfið að uppfylltum eftirfarandi skilyrðum.

Samþykkt á Uppreisnarþingi 2023

 

Uppreisn vill fara í víðtæka sameiningu sveitarfélaga á landinu. 

Stefnt skal að því að lágmarksfjöldi íbúa í sveitarfélögum sé 10.000 manns, þó með teknu tilliti til að landfræðilegrar legu. Þannig sé hægt að byggja upp öflugri stjórnsýslueiningar innan hvers sveitarfélags og tryggja öflugri þjónustu og hagræðingu í rekstri.

Samþykkt á Uppreisnarþingi 2022

 

  1. Uppreisn ályktar að jafnt ríki og sveitarfélög skuli auka skógrækt á landsvæðum í þeirra eigu. 

  2. Losun vegna landnotkunnar (LULUCF) er umfangsmesti losunarflokkurinn þegar heildarlosun Íslands er skoðuð. Losun vegna landnotkunar er mest af völdum gras- og votlendis. Árangursríkasta leiðin til að draga úr losun í þessum losunarflokki er með viðhaldi og ræktun skóga. Skógrækt eflir enn fremur líffræðilega fjölbreytni landsins og eru skógar auðlind sem nýtist að mörgu leyti. 

  3. Ríki og sveitarfélög skulu hafa metnaðarfulla stefnu um aukna skógrækt og minnkun gras- og votlendissvæða m.a. með því að umbreyta svæðunum í skóga. Markmið þessara stefna skulu vera mælanleg og tímasett og sæta reglulegri endurskoðun byggt á nýjustu loftslagsvísindum og árangri í málaflokknum.

Samþykkt á Uppreisnarþingi 2024

  1. Uppreisn ályktar að taka ætti upp samhæfð próf í síðasta bekk í grunnskóla

     

  2. Prófinu er ætlað að samhæfa inntökuskilyrði inn í menntaskóla.

     

  3. Umsóknir grunnskólabarna sem sækja um í menntaskóla eru undir mikilli samkeppni samnemanda sinna og hefur þróunin verið sú mörg grunnskólabörn sækja um í sömu skólana

     

  4. Uppreisn ályktar að öll ættu að hafa sömu tækifæri til þess að vera samþykkt inn í þá menntaskóla sem þau óska eftir, og þarf því að staðla inntökuna og hæfnimat þvert á alla skóla og öll börn.

Samþykkt á Uppreisnarþingi 2020, endurnýjað á Uppreisnarþingi 2024

 

  1. Uppreisn ályktar að taka eigi Ríkisútvarpið af auglýsingamarkaði og lágmarka áhrif þess á samkeppni ásamt því að endurskoða þarf hlutverk og umfang RÚV.

  2. Vera ríkisútvarpsins á auglýsingamarkaði skekkir óneitanlega samkeppnisstöðu einkarekinna fjölmiðla. Til að tryggja fjölbreytta flóru fjölmiðla og gera fjölmiðlamarkaðinn aðgengilegri er mikilvægt að ríkið lágmarki áhrif sín þar.

  3. Endurskoða þarf hlutverk og starfssemi RÚV í takt við tækniframfarir. Frekar væri unnt að mynda sérstakan úthlutunarsjóð fyrir innlent menningarefni og dagskrárgerð sem allir fjölmiðlar hefðu jafnt aðgengi að. RÚV gegnir þó mikilvægum hlutverkum á sviði menningar, upplýsinga, fræðslu og almannavarna. Standa þarf vörð um þau hlutverk samhliða endurskoðun á annari starfsemi miðilsins.

Samþykkt á Uppreisnarþingi 2024

 

  1. Uppreisn ályktar að sjónarmið mannúðar og frjálslyndis skuli ráða för við stefnumótun í útlendingamálum, hvort sem um er að ræða inngildingu, húsnæði, verndarákvarðanir, atvinnuleyfi eða nokkuð annað sem viðkemur málaflokknum.

  2. Stefna í útlendingamálum skal miða að því að byggja brýr og halda utan um viðkvæmustu hópana sem hingað leita, en ekki mynda gjár á milli þeirra sem leita hingað og þeirra sem nú þegar búa á Íslandi.

  3. Ef horft er til stefnu annarra þjóða við lagasetningu á Íslandi skal tryggt að ekki séu tekin upp ákvæði eða reglugerðir sem stríða gegn grundvallarsjónarmiðum mannúðar og frjálslyndis.

  4. Mikilvægt er að stjórnvöld bregðist við útlendingaandúð í samfélaginu og að stefnumótun sé til þess fallin að sporna gegn andúð og fordómum í íslensku samfélagi.

Samþykkt á Uppreisnarþingi 2020, endurnýjað á Uppreisnarþingi 2024

 

  1. Uppreisn ályktar að leitast skuli við að takmarka umfang hins opinbera og lágmarka eignasafn þess.
     
  2. Hið opinbera rekur fyrirtæki á fjölmörgum sviðum sem teljast ekki til grunnþjónustu, oft í samkeppni við einkaaðila. 

  3. Ríkið ætti að selja hlut sinn í fyrirtækjum sem ekki teljast til grunnþjónustu og leitast við að lágmarka almennt veru sína á samkeppnismörkuðum og þar sem vera þess er almennt ekki nauðsynleg.

Samþykkt á Uppreisnarþingi 2022

 

  1. Uppreisn ályktar að bjóða eigi umtalsvert meira valfrelsi í samgöngum en tíðkast hefur. 

  2. Tryggjum að Borgarlína verði byggð upp hratt og vel, þannig að hún njóti forgangs í umferðinni og verði því raunhæfur kostur, samhliða betri strætó og ennþá betri göngu- og hjólreiðatengingar en áætlanir gera ráð fyrir. 

  3. Verum áfram opin fyrir nýjungum, líkt og rafhlaupahjólum og greiðum veginn fyrir þeim frekar en að festa í flækjustigi. Því meira sem virkum samgöngumátum er gert hærra undir höfði þeim mun grænna, frjálsara og þjónustuvænna verður samfélagið.

Samþykkt á Uppreisnarþingi 2023

 

Uppreisn vill að Ísland haldi áfram þeirri vegferð að leggja meira til varnarmála í samræmi við skuldbindingar okkar til NATO. Ísland hefur verið eftirbátur í varnarmálum í mörg ár og hefur þurft að reiða sig á aðra þegar kemur að vörnum Íslands. Með því að taka virkan og beinan þátt í varnarmálum er Ísland að sýna getu og hæfni sem sjálfstæð þjóð og sem virkur þátttakandi í alþjóðasamstarfi. Ísland á að setja sér markmið að vera leiðandi í netöryggismálum.

Samþykkt á Uppreisnarþingi 2022

 

  1. Uppreisn ályktar að endurskoða beri grunnskólakerfið frá heild svo það þjóni fyrst og fremst þörfum nemenda. 

  2. Þrátt fyrir ýmis konar breytingar í áranna rás er það miður staðreynd að kjarni skólakerfisins hefur haldist hinn sami í meira en öld, þegar vitneskja um getu og þarfir barna var allt önnur en hún er nú. 

  3. Tímabært er að innleiða nýjar nálganir og aðferðir í takt við tímann, auk þess að styðja við einkarekna skóla til jafns við opinbera skóla því oftar en ekki eru þeir brautryðjendur í nýjum kennsluháttum. Sama fjármagn ætti að fylgja hverjum nemenda inn í einkarekna skóla og einkareknum skólum sem fá þau framlög ekki heimilt að innheimta skólagjöld. Þannig bjóðum við nemendum og kennurum nærandi umhverfi sem ræktar það besta í okkur öllum.