19 mar Árangur í útlendingamálum
Festa í útlendingamálum er nauðsynleg til að Ísland geti áfram verið frjálslynt og opið samfélag.
Þegar ég tók við embætti dómsmálaráðherra var ljóst að endurskoða þyrfti útlendingakerfið og taka það fastari tökum. Landsmenn voru hættir að treysta kerfinu og reglurnar of bútasaumskenndar. Skilaboð stjórnvalda voru ekki skýr og almenningur upplifði stjórnleysi.
Nú er þetta að breytast. Skref fyrir skref.
Alþjóðleg vernd fyrir þá sem eiga rétt á henni
Meginstef okkar í verndarmálum hefur verið að vernd á að vera veitt þeim sem raunverulega þurfa á henni að halda. Við þurfum að leggja okkur fram við að þjónusta fólk sem hingað kemur úr erfiðum aðstæðum. Kerfið má þó ekki vera þannig úr garði gert að hægt sé að misnota það eða tefja mál og græða á því.
Lög um afturköllun verndar hafa nú verið samþykkt. Nú er hægt að svipta fólk alþjóðlegri vernd ef það er til dæmis dæmt fyrir nauðgun, ofbeldi eða ítrekuð afbrot. Með þessum lagabreytingum höfum við styrkt trúverðugleika kerfisins. Því verður að fylgja ábyrgð að fá alþjóðlega vernd. Alvarleg afbrot þeirra sem hingað sækja skjól verða að hafa afleiðingar.
Jafnframt höfum við unnið markvisst að því að vísa brott EES-borgurum sem hafa gerst sekir um afbrot. Frjáls för fólks felur ekki í sér frjálsa för glæpamanna.
Hin séríslenska 18 mánaða regla var líka afnumin með nýlegum lögum. Þessi regla skapaði hvata til að tefja málsmeðferð og gróf undan jafnræði. Kerfi sem umbunar töfum er slæmt. Við leiðréttum það.
Festa og skynsemi
Ég hef lagt fram frumvarp um brottfararstöð til að tryggja að ákvarðanir um brottvísun séu ekki bara orð á blaði. Við viljum standa jafnfætis öðrum ríkjum í Schengen svo upplýsingaflæði og alþjóðlegt samstarf sé raunverulega virkt og skili árangri. Ég hef lagt til skýrari heimildir til að vísa erlendum föngum úr landi að afplánun lokinni. Þeir fá endurkomubann og geta þar af leiðandi ekki snúið aftur til okkar.
Við erum að endurskoða reglur um dvalarleyfi námsmanna til samræmis við regluverk Norðurlandanna. Og við höfum lagt áherslu á að tímabundin vernd sem fólk fær vegna stríðsins í Úkraínu leiði ekki sjálfkrafa til varanlegs dvalarleyfis. Það er gert til að samræma reglur okkar við Norðurlöndin, sem öll standa þétt við bakið á Úkraínumönnum.
Sterkara eftirlit á landamærum
Lögum þarf að fylgja í framkvæmd. Þess vegna höfum við ráðist í aðgerðir sem styðja við raunverulega breytingar. Alþingi hefur samþykkt lög sem skylda nú flugfélög til að afhenda alla farþegalista. Þar með styrkjum við landamæraeftirlit. Ísland er eyja en ekki eyland og það er sjálfsögð krafa að við vitum hverjir koma til landsins.
Við höfum fjölgað lögreglumönnum um 50 og kynnt fyrstu heildarstefnu Íslands gegn skipulagðri glæpastarfsemi. Ísland á ekki að vera veikur hlekkur í alþjóðlegu samhengi –hvorki gagnvart skipulögðum glæpahringjum né þeim sem nýta sér glufur í kerfunum.
Við höfum þegar náð árangri sem um munar.
Ísland á að vera opið samfélag sem stendur vörð um mannréttindi og alþjóðlegar skuldbindingar. Við eigum líka að standa vörð um öryggi, réttarríkið og traust almennings. Þessi tvö sjónarmið útiloka ekki hvort annað, heldur eru þau grunnurinn að frjálslyndu samfélagi.