07 maí Endurminningar fyrrum unglings í Ísafjarðarbæ

Árið er 2007. Ég er nýflutt til Ísafjarðar frá Flateyri, 13 ára gömul og þekki ekki marga. Kannast við nokkrar stelpur sem ég var með í kór Tónlistarskólans árið áður og man eftir örfáum krökkum frá því á Reykjum (þorði reyndar lítið að tala við Ísfirðingana þar) en það er allt og sumt. Þrátt fyrir kvíða og feimni mæti ég á alla viðburði, öll böll og auðvitað í félagsmiðstöðina. 

—————

Félagsmiðstöðin í kjallara Sundhallarinnar var opin þrjú kvöld í viku, tvo eða þrjá seinni parta og á skólatíma svo þar var hægt að hanga í frímínútum og ef tímar féllu niður. Smám saman læddist ég út úr skelinni og fór að taka virkan þátt í félagslífinu. Fór í Morrann. Og í nemendaráð. Ég eignaðist fullt af vinum sem eru ennþá í lífi mínu í dag.

Það var góður andi í félagsmiðstöðinni. Hún hafði aðdráttarafl fyrir unglinga bæjarins og varð fyrir mörg okkar eins og nokkurs konar heimili að heiman. Félagsmiðstöðin var til staðar fyrir þau sem þrifust ekki í íþróttum og öðrum tómstundum og bara góður staður til hitta vini sína, skapa tengsl, leysa úr ágreiningi, spila borðtennis, stofna drengjakór og hanga. Þetta hafði marga kosti í för með sér og ekki síst mikið forvarnargildi.

Það varð því ákveðinn skellur þegar við fórum upp í Menntaskólann og höfðum allt í einu ekkert rými, ekki þetta verndaða umhverfi sem hafði haldið svo vel utan um okkur á unglingsárunum. Við nemendurnir óskuðum eftir því að fá félagsmiðstöð fyrir okkar aldurshóp og á það var hlustað. Ungmennahúsið Valhöll var sett á fót á Sundhallarloftinu sem tilraunaverkefni í þrjá vetur, félagsmiðstöð fyrir 16 ára og eldri sem var opin u.þ.b. einu sinni til tvisvar í viku.

Hver er staðan í dag?

Í dag er ekkert ungmennahús til staðar fyrir menntaskólanema og félagsmiðstöð 8.-10. bekkjar á Ísafirði er opin aðeins þrjú kvöld í viku. Hér getum við svo sannarlega gert betur, í öllum byggðakjörnunum. Það þarf að auka tómstundastarf og afþreyingamöguleika fyrir ungt fólk og þar ætti nýtt ungmennaráð að leiða stefnumótunina. Það skiptir máli að bjóða upp á valkosti sem koma til móts við ungmennin sjálf og verða raunverulega nýttir. Þar þurfum við að hlusta.

Hvað getum við gert?

Við viljum skoða það að stofna ungmennahús á ný og byggja upp samstarf við Bergið headspace. Einnig viljum við gera tilraun til þess að endurvekja skapandi sumarstörf fyrir unglinga.

Á sama tíma er fjölbreytt starfsemi nú þegar í boði fyrir ungt fólk á svæðinu sem sveitarfélagið getur sannarlega stutt við, og það getum við gert strax. Þar má nefna lengri opnunartíma sundlauga, Björgunarsveitirnar, íþróttafélögin, Edinborgarhúsið, Bókasafnið, félagsmiðstöðvarnar og margt fleira. Almenningssamgöngur þurfa einnig að virka betur til að auka frelsi og aðgengi að öllu því sem í boði er.

Góð æsku- og unglingsár = sterkari rætur

Ég var svo heppin að eiga góða æsku á Flateyri og unglingsár á Ísafirði. Ég skaut niður rótum sem, kom á daginn, var ekki auðvelt að slíta upp. Ef við viljum fá ungt fólk til að setjast hér að þá eigum við ekki einungis að einblína á að laða ungar fjölskyldur til baka, við þurfum að búa börnum okkar og unglingum góða æsku svo þau geti skotið rótum sem toga alltaf í þó farið sé að heiman. Þar er mikilvægt að hlusta á unga fólkið og tryggja að þau fái fjölbreytt tækifæri til þess að blómstra.

Við í Viðreisn leggjum áherslu á þetta og erum þakklát og ánægð með að hin framboðin séu sammála okkur í því. Framtíðin er björt í Ísafjarðarbæ.

Arnheiður Steinþórsdóttir

Skipar 4. sæti á lista Viðreisnar í Ísafjarðarbæ